Ish-drejtoresha e Shërbimit Informativ Shtetëror, Vlora Hyseni, e cila u vetëdorëzua një ditë më parë në pikën e kalimit kufitar në Morinë, do të përballet me Gjykatën e Posaçme të enjten për t’u njohur me masën e sigurisë.
GJKKO, me kërkesë të SPAK, i ka caktuar masën e arrestit në shtëpi dhe pezullim nga ushtrimi i detyrës, për shkak të ndihmës që ajo dyshohet se i ka dhënë Ergys Agasit.
Siç rezulton në dosjen e SPAK, ajo ka pasur komunikime periodike të përditshme me Agasin gjatë kohës që ai ishte në kërkim nga Prokuroria e Posaçme.
Vetë Hyseni, e pyetur më datën 18 shtator nga prokurorët e SPAK, ka pranuar se ka pasur komunikime me Ergys Agasin, por ka thënë se Agasi i kishte ofruar asaj bashkëpunim dhe ka mohuar takimet fizike apo faktin që Agasi të ketë siguruar informacione nga Shërbimi Informativ i Shtetit. Ajo është zotuar të kthejë përgjigje zyrtare, me shkresë të klasifikuar, mbi origjinën e disa diagrameve të SHISH që SPAK ka sekuestruar në makinën e Agasit.
Këto diagrama janë gjetur në një makinë të Agasit në një resort në Tiranë më 20 korrik 2026. Gjatë seancës gjyqësore për verifikimin e masës së sigurisë, SPAK thotë se Agasi ka pranuar se mjeti ishte i tij dhe se i kishte lënë këto sende me qëllim që t’i gjenin organet e Prokurorisë së Posaçme.
Por sipas SPAK, Agasi jo vetëm që nuk ka qenë në rolin e “bashkëpunëtorit”, por në të kundërt është ai që merr dhe dikton informacionin e marrë, ndërsa kreu i SHISH nuk ka vënë në dijeni asnjë nga instancat, qoftë paralele apo brenda institucionit, për të ashtuquajturin bashkëpunëtor.
Prokuroria e Posaçme shprehet se komunikimet mes kreut të shkarkuar të SHISH dhe Agasit përfshinin jo vetëm telefonata të thjeshta, por edhe video call dhe dërgim e marrje fotosh e videosh, gjë që sipas SPAK rrëzon alibinë e bashkëpunëtorit të pretenduar nga deklarimi i Vlora Hysenit.
Në total, për periudhën 28 qershor 2026 deri më 26 gusht 2026, data e arrestimit të shtetasit Ergys Agasi, nëpërmjet aplikacionit “Signal”, janë regjistruar 70 thirrje të bëra nga Vlora Hyseni në drejtim të Agasit, 17 thirrje dalëse nga Agasi te Hyseni, 28 thirrje të humbura dhe 25 thirrje ku Agasi nuk i është përgjigjur Hysenit.
Në dosjen e SPAK thuhet se në telefonin e Agasit janë të ruajtura gjithsej 508 forma komunikimi, thirrje, voice, video, video call dhe mesazhe, vetëm në 2 muaj.
Këto komunikime, thotë SPAK, tregojnë jo thjesht një lidhje personale, por identifikimin e shtetases Vlora Hyseni me qëndrimin dhe interesat e personit nën hetim ndaj procedimit penal që zhvillohej kundër tij, si dhe gatishmërinë e saj për t’i qëndruar pranë e për ta ndihmuar gjatë kohës që ai ishte në kërkim, duke vënë kështu në dispozicion cilësinë e saj zyrtare dhe kapacitetet institucionale që drejtonte.
Të enjten para gjykatës do të dalë jo vetëm ish-shefja e SHISH, por edhe efektivi i policisë Fatjon Kalluçi dhe biznesmeni Embro Sulejmani, që u arrestuan të martën pas zbërthimit të celularit të Ergys Agasit.