Dënimi skandaloz i ish-krerëve të Ushtrisë Çlirimtare të Kosovës në Hagë ka nxitur reagime të forta politike në të gjithë rajonin, ndërsa ka nxjerrë sërish në pah retorikën agresive të presidentit serb, Aleksandar Vuçiç. I përballur me një qëndrim të palëkundur kombëtar nga zëvendëskryeministri i Malit të Zi, kryetari i Forumit Shqiptar, Nik Gjeloshaj, i cili deklaroi hapur se lufta e UÇK-së ishte çlirimtare dhe se çdo shqiptar e mban në zemër këtë përpjekje të shenjtë, Vuçiç është tërbuar publikisht gjatë një konference për media në Beograd.
I papërmbajtur nga kjo deklaratë, Vuçiç pyeti publikisht dhe me ironi nëse Perëndimi do t’i bllokojë integrimet evropiane të Malit të Zi, duke pretenduar se qëndrime të tilla mohojnë sundimin e ligjit.
Sulmi i hapur i presidentit serb ndaj Gjeloshajt vjen pikërisht në momentin kur komandantët e UÇK-së u dënuan në Hagë. Kjo orvatje e radhës e Beogradit duket se përshtatet me një plan më të gjerë strategjik për të goditur, tkurrur dhe dobësuar faktorin shqiptar në rajon, e në mënyrë të veçantë në Malin e Zi, ku prania dhe roli i shqiptarëve mbeten kyç për stabilitetin dhe orientimin euroatlantik.
Më poshtë vijon artikulli i plotë i publikuar nga media malazeze Vijesti:
Artikulli i transmetuar nga “Vijesti”:
Vuçiq: A do t’i ndalin integrimet evropiane të Malit të Zi për shkak të deklaratës së Gjelošajt?
”Njëri që guxoi të thoshte se i ka shprehur ngushëllime dikujt, tani nuk guxon as të shikojë lart, e lëre më diçka tjetër në Malin e Zi,” tha presidenti i Serbisë.
Presidenti i Serbisë, Aleksandar Vuçiq, ka pyetur se a do të ndalen integrimet evropiane të Malit të Zi pas deklaratës së zëvendëskryeministrit të Malit të Zi, Nik Gjeloshaj, se “çdo shqiptar mban në zemër luftën e shenjtë” të Ushtrisë Çlirimtare të Kosovës (UÇK).
Dhomat e Specializuara të Kosovës në Hagë dënuan sot në shkallë të parë ish-drejtuesit e UÇK-së, Hashim Thaçin dhe Jakup Krasniqin me nga 25 vjet burgim, ndërsa Kadri Veselin dhe Rexhep Selimin me 18, përkatësisht 13 vjet burgim, për krime me prapavijë luftime në Kosovë dhe Shqipëri gjatë viteve 1998 dhe 1999.
”Njëri që guxoi të thoshte se i ka shprehur ngushëllime dikujt, e që më nuk guxon as të shikojë lart, e lëre më diçka tjetër në Malin e Zi, sot iu desh të dëgjonte — dhe të gjithë ne u deshtë të dëgjonim — nga ministri malazez Gjelošaj, i cili thotë: ‘Çdo shqiptar mban në zemër luftën e shenjtë të UÇK-së’. A do t’i ndalin për këtë shkak integrimet evropiane, pasi po pështyjnë mbi aktgjykimin dhe po mohojnë sundimin e ligjit, apo kjo vlen vetëm për serbët? Ata thonë: ‘Kurrë nuk kam besuar se një vendim gjyqësor mund të jetë kaq i padrejtë. Lufta e UÇK-së ishte çlirimtare’, porosit zëvendëskryeministri i Malit të Zi për politikë ekonomike dhe ministri i zhvillimit ekonomik,” deklaroi Vuçiq në një konferencë për media në ndërtesën e Presidencës së Serbisë në Beograd.
Kryetari i Kuvendit të Malit të Zi, Andrija Mandiq, së fundmi tha se i kishte shprehur ngushëllime familjes së Ratko Mlladiqit me rastin e vdekjes së ish-komandantit të luftës të Ushtrisë së Republikës Srpska. Pas kësaj, Partia Demokratike e Socialistëve (DPS) në opozitë paraqiti iniciativën për shkarkimin e Mandiqit, për të cilën deputetët duhet të deklarohen në seancën e 24 shtatorit. Tribunali i Hagës e kishte shpallur Mlladiqin fajtor për gjenocid në Srebrenicë, krime kundër njerëzimit dhe shkelje të ligjeve e zakoneve të luftës në Bosnjë e Hercegovinë.
Vuçiq, duke komentuar edhe deklaratat e zyrtarëve të tjerë nga rajoni, tha se mund të shihet “se sa standarde double, gënjeshtra dhe mungesë parimesh ka në rrethim.”
Reagimi i Gjeloshajt për komandantët:
Lajm shumë i keq dhe një vendim jashtëzakonisht i padrejtë!
Sot mund të jetë ditë zie për shqiptarët, por qëndrimi dinjitoz i të akuzuarve i jep forcë popullit shqiptar që ta përballojë këtë dhimbje, me besimin se ky aktgjykim i tmerrshëm do të rrëzohet në instancat më të larta.
Nuk kam besuar kurrë se një vendim gjyqësor mund të ishte i tillë dhe kaq i padrejtë. Ky është vendim i shkallës së parë dhe procesi gjyqësor nuk ka përfunduar.
Besojmë se, deri në përfundimin e plotë të procesit, do të dëshmohet pafajësia e të gjithëve.
Lufta e UÇK-së ishte vetëmbrojtëse, çlirimtare dhe e drejtë. Ishte luftë për mbijetesën, lirinë dhe shtetin e Kosovës, e përkrahur nga aleatët tanë perëndimorë. Agresori nuk mund dhe nuk duhet të barazohet me atë që është detyruar të mbrohet.
Shqiptarët dhe vetë të akuzuarit i kanë respektuar institucionet ndërkombëtare. Ata as nuk kanë ikur, as nuk janë fshehur, por janë paraqitur para drejtësisë dhe do ta vazhdojnë betejën e tyre ligjore deri në fund.
Çdo shqiptar e ka në zemër luftën e shenjtë të UÇK-së dhe komandantin legjendar Adem Jashari. Çdo shqiptar beson në pafajësinë e tyre!
Liria dhe pavarësia kanë një vulë: UÇK-ja dhe Amerika!
P.S.
Nuk ia vlen të komentohet nxjerrja e një deklarate sime nga konteksti dhe manipulimi me të. Biseda ishte për respektimin e vendimeve të gjykatave ndërkombëtare nga shqiptarët, për dallim nga qëndrimi i palës tjetër.
Kurrë nuk kam besuar se gjykatat ndërkombëtare mund të bëjnë padrejtësi. Edhe Ante Gotovina përjetoi padrejtësi në shkallën e parë, por në shkallën e dytë fitoi drejtësia.
Besojmë deri në fund; beteja për drejtësi vazhdon!
NGJ