Portieri i Kombëtares shqiptare, Etrit Berisha, ka dalë në konferencë për shtyp në prag të sfidës ndaj Finlandës, e programuar për t’u luajtur më 12 nëntor në stadiumin “Air Albania”.

Gardiani kuqezi theksoi se nuk e konsideron këtë përballje si një ndeshje revanshi për atë që ndodhi në takimin e parë, por nënvizoi rëndësinë e marrjes së tri pikëve.

Sipas tij, Shqipëria e ka fatin në duart e veta dhe mbështetja e tifozëve do të jetë vendimtare.

“Nuk është revansh, secila ndeshje ka historinë e vet. Për ne është shumë e rëndësishme që t’i kemi tifozët afër”, u shpreh Berisha.

Ai u rikthye edhe tek episodi i kartonit në ndeshjen e parë në Finlandë, duke pranuar se ai moment ndryshoi rrjedhën e takimit dhe e vështirësoi situatën për kuqezinjtë.

“Gjërat që kanë ndodhur nuk mund të kthehen prapa. Ishte një moment ku ndryshoi rrjedha e lojës. Nëse ai moment do të kalohej, ndeshja ishte nën kontrollin tonë”, shpjegoi portieri.

Berisha kërkoi që skuadra të përqendrohet vetëm te sfida e radhës, duke paralajmëruar se Finlanda nuk duhet nënvlerësuar.

“Kemi marrë një mësim në ndeshjen e fundit. Nuk duhet të nënvlerësohet asnjë kundërshtar, aq më pak Finlanda. Kemi lojtarë me kualitet dhe dëshira jonë është të dalim sa më mirë”, deklaroi Etrit Berisha.

The post Kombëtarja/ Etrit Berisha paralajmëron Finlandën: Kemi marrë një mësim, këtë herë gjithçka është në duart tona! appeared first on GIJOTINA.