Kryeministri Rama ka reaguar sërish për pagat e gjyqtarëve me një tjetër tabelë, duke krahasuar pagën e tyre mesatare me atë të administratës shtetërore.

Sipas tabelës, Shqipëria qëndron në vendin e katërt të pagës mesatare më të lartë për gjyqtarët, 3804 euro. Në vend të parë është Greqia me 5451 euro, të dytë Rumania me 5422 euro dhe të tretë Sllovenia me 4193 euro. Nëse do të aplikohej rritja e kërkuar nga gjyqtarët, Shqipëria do të kalonte në vendin e parë me 5375 euro pagë mesatare, duke i lënë pas të tjera.

Rama shkruan se sot maja e piramidës së pagave në vendet e tjera konsiderohet e presidentit. Por duke marrë pagën mesatare të rritur të gjyqësorit në Shqipëri, niveli do të arrinte 1 mijë euro më shumë se presidenti. Ndërsa nëse merret niveli më i lartë i gjyqësorit që paguhet 2 mijë euro më shumë se presidenti, rritja do ta bënte diferencën e pagës mes tyre 5 mijë euro.

“Sot paga mesatare e gjyqtarëve në Shqipëri është 280% më e lartë se paga mesatare të administratës shtetërore; 60% më e lartë se paga mesatare e kolegëve në Malin e Zi dhe Maqedoninë e Veriut; më e lartë se në Kroaci, Bullgari apo Serbi…

Me rritjen e kërkuar me llogarinë vetë Zot vetë Shkop, paga mesatare e gjyqtarëve bëhet më e lartë se në Greqi, Rumani e Slloveni dhe 140% më e lartë se në Mal të Zi dhe Maqedoninë e Veriut, ndërsa në raport me administratën shqiptare ajo kërcen në 470% më shumë…

Dhe nëse në të tëra vendet e tjera të rajonit, Europës dhe botës demokratike maja e piramidës së pagave në shtet është Presidenti, paga mesatare e rritur në rrugën jashtë parlamentit bëhet 1,000 euro më e lartë se paga e Presidentit dhe 2,200 euro më e lartë se paga e ministrit. Kjo për mesataren e gjithë trupës, se duke marrë nivelin më të lartë të pagës në sistemin gjyqësor sot, aktualisht, është gati 2000 Euro më shumë se e Presidentit dhe 3000 Euro më e lartë se e ministrit, po bashkë me rritjen?!.. Oh, aty pastaj shkon mbi 5000 Euro më e lartë se e Presidentit dhe 6300 Euro më shumë se e ministrit!

Duket si fantazi e shfrenuar po në fakt është lënda e kallëzimit penal që shoqatat e gjykatësve i kanë bërë Ministrit të Financave dhe drejtorëve të thesarit në tërë Shqipërinë, pse nuk dorëzojnë çelësat e thesarit për marrjen e këtyre shumave marramendëse pa vendim të parlamentit…”, shkruan Rama.