Lionel Messi e ka pranuar se është i emocionuar për gjysmëfinalen e Kupës së Botës ndaj Anglisë, një sfidë që do të jetë historike për të, pasi do të jetë hera e parë në karrierën e tij që do të përballet me “Tre Luanët” me fanellën e Argjentinës.

Kapiteni i kampionëve të botës e cilësoi këtë duel si një ndeshje të veçantë, jo vetëm për rëndësinë që e ka në rrugën drejt finales, por edhe për historinë e madhe që e shoqëron rivalitetin mes dy kombëtareve.

“Jam shumë i emocionuar. Është hera e parë që do të luaj kundër Anglisë dhe e vërteta është se mezi e pres këtë ndeshje. E dimë se çfarë përfaqëson ky duel për historinë e futbollit dhe për të dy vendet”, u shpreh Messi pas fitores me Zvicrën.

Sulmuesi argjentinas theksoi se Anglia është një kundërshtar shumë i fortë, me futbollistë të nivelit të lartë, por shtoi se Argjentina ka besim të plotë te forcat e saj.

“Do të jetë një ndeshje shumë e vështirë, si të gjitha në këtë fazë të Kupës së Botës. Anglia e ka një ekip të madh, por edhe ne kemi treguar se jemi një skuadër konkurruese dhe do të bëjmë gjithçka për të arritur në finale”, deklaroi ai.

Argjentina e siguroi një vend në katërshen më të mirë pasi e mposhti Zvicrën me rezultatin 3-1, ndërsa Anglia e eliminoi Norvegjinë me fitore 2-1.

Dy kombëtaret do të përballen në gjysmëfinalen që premton të jetë një nga ndeshjet më spektakolare të këtij Botërori.

The post Për herë të parë do luajë kundër Anglisë, Messi s’i fsheh emocionet: Mezi po e pres! appeared first on GIJOTINA.