Rreth 50 kursantë të Akademisë së Sigurisë dyshohet se janë helmuar sërish nga ushqimi.

Sipas raportimeve në media, mbrëmjen e djeshme rreth orës 21:00 kursantët kanë pasur simptoma si të vjella, diarre, temperaturë dhe dhimbje koke.

Disa prej tyre kanë përfunduar në spital për ndihmë mjekësore.

Kujtojmë se kjo është hera e dytë që studentët e Akademisë helmohen në një afat kohor kaq të shkurtër. Edhe më 7 maj u helmuan 56 kursantë të akademisë së Sigurisë pas konsumimit të drekës.

Kompania e cila siguronte ushqimin për studentët është “SORI-AL”, e çiftit Nikolin Jaka dhe Alma Tafani.

Kompania pas rastit të parë të helmimit u bllokua, por pak ditë më vonë AKU zhbllokoi aktivitetin me argumentin se analizat dhe rezultatet kanë dalë brenda normave të lejuara për treguesit e higjienës.

Ndërkohë, nga viti 2019 deri sot, kjo dyshe ka përfituar tre kontrata rresht, pa garë, pa konkurrencë, me një rritje prej 70 për qind të tarifës mujore.

The post Skandal/ Rasti i dytë brenda pak javësh, helmohen përsëri nga ushqimi 50 studentë të Akademisë së Sigurisë appeared first on GIJOTINA.