U dënua me 1 vit burg për korrupsion, arrestohet kryebashkiaku socialist Edison Memolla

Kryetari i Bashkisë së Rrogozhinës, Edison Memolla, është arrestuar pasi Gjykata e Posaçme e Apelit la në fuqi dënimin me 1 vit burg për veprën penale “korrupsioni aktiv në zgjedhje”, kryer në bashkëpunim.

Memolla u vetëdorëzua në polici pas vendimit të datës 9 shkurt 2026. Bashkë me të u arrestuan edhe dy bashkëpunëtorët e tij, Blerim Xhamani, 48 vjeç, dhe Ndriçim Tafgjata, 54 vjeç, të tre banues në Rrogozhinë.

Gjithashtu gjykata i ka hequr Memollës të drejtën për të ushtruar funksione publike për 5 vite.

Me 1 vit burg është dënuar edhe Blerim Xhamani për “korrupsion aktiv në zgjedhje” dhe “falsifikim dokumentesh”, të kryera në bashkëpunim. Ndriçim Tafgjata është dënuar po ashtu me 1 vit burg për “korrupsion aktiv në zgjedhje”.

Ndërsa Isuf Tosku, i akuzuar për “falsifikim dokumentesh”, është dënuar me 8 muaj burg, por dënimi i tij është pezulluar dhe është vendosur në shërbim prove për 1 vit e 4 muaj.

Hetimet ndaj Memollës nisën pas publikimit në media të një audio-përgjimi, ku sipas Struktura e Posaçme kundër Korrupsionit dhe Krimit të Organizuar (SPAK), ai dëgjohej duke ndërhyrë tek një punonjës i OSHEE-së për të mos i ndërprerë energjinë elektrike një abonenti debitor, me qëllim që të siguronte votën e saj në zgjedhjet e pjesshme vendore të 6 marsit 2022.

Në atë kohë, Memolla kandidonte për kryetar bashkie nën siglën e Partisë Socialiste.

SPAK përfundoi hetimet për këtë çështje më 2 nëntor 2023, ndërsa tashmë, me vendimin e formës së prerë, dënimi ka hyrë në fuqi.

The post U dënua me 1 vit burg për korrupsion, arrestohet kryebashkiaku socialist Edison Memolla appeared first on GIJOTINA.