Brigitte Bardot rrëfen luftën me depresionin: Tentova vetëvrasjen

Ikona franceze e kinemasë, Brigitte Bardot, ka folur hapur për betejën e saj me shëndetin mendor në një projekt të ri dokumentar që rrëfen jetën e saj.

Aktorja 91-vjeçare, në një intervistë për The Times of London, zbuloi se ka tentuar disa herë vetëvrasjen gjatë rinisë – por një prej këtyre momenteve mori një kthesë të papritur.

“Po tentoja ti jepja fund jetës time, dhe u shpëtova nga një mrekulli,” tha Bardot.

Ajo pranoi se statusi i saj si simbol seksi në vitet ’60 i shkaktoi trazira të mëdha emocionale dhe e çoi drejt depresionit. “Çdo mëngjes zgjohem dhe jam e trishtuar,” u shpreh aktorja.

Ndër vite, Bardot u bë e famshme për rolet në filma të njohur si “And God Created Woman” (1956), “The Truth” (1960) dhe “Viva Maria!” (1965). Megjithatë, ajo thotë se nuk i intereson si do të mbahet mend nga publiku.

“Nuk më intereson nëse njerëzit do të më kujtojnë mua. Dua që të kujtojnë respektin që i detyrohemi kafshëve. Sa më shumë kalon jeta, aq më shumë i trembem njerëzve. Jam më shumë kafshë se njeri,” deklaroi aktorja.

Dokumentari i ri, që do të shfaqet në kinema franceze më 3 dhjetor, ofron një “shikim intim” në jetën e saj dhe realizohet me mbështetjen e plotë të Bardot. Ajo bën një paraqitje të shkurtër në film, por kryesisht është zëri i saj që rrëfen historinë.

Regjisori Alain Berliner e përshkroi Bardot-in si një “person shumë misterioz”, por vendosi që ajo vetë të tregojë historinë – pa narratorë të jashtëm.

Projekti vjen pak pasi Bardot u detyrua të përgënjeshtronte thashethemet për vdekjen e saj që qarkulluan në tetor. “Nuk e di kush është idioti që nisi këtë ‘fake news’, por jam mirë dhe nuk kam ndërmend të largohem,” shkroi ajo në X.

 

The post Brigitte Bardot rrëfen luftën me depresionin: Tentova vetëvrasjen appeared first on Lapsi.al.