Më 31 maj të vitit 2015 në Berlin, Luis Enrique fitonte Champions League për here të parë si trajner, dhe me të ajo që festoi më shumë ishte vajza e tij Xana, e cila në atë kohë ishte vetëm 6 vjeç. Imazhi i skalitur në mendjen e trajnerit nga triumfi me Barcelonën është ai i vajzës me flamurin e klubit blaugrana bashkuar me atë katalanas në dorë: ajo e valëviti dhe më pas e nguli në barin e “Olympiastadion”, nën sytë e lumtur të të atit.
Në vitin 2019, më pas, e vogla Xana u nda nga jeta para kohe në moshën 9-vjeçare për shkak të një forme ndër më të rrallat, më të rëndat dhe më agresivet të tumorit në kocka (osteosarkomë): “Për mua ajo nuk ka vdekur, por është gjithmonë me ne. Shpirtërisht është. Çdo ditë flasim për të dhe besoj se Xana na vështron ende nga diku,” ka rrëfyer së fundmi trajneri spanjoll, i cili disa ditë pas PSG-Manchester City 4-2, në konferencën për shtyp para ndeshjes me Lens, kishte shprehur një dëshirë: “Mbaj mend një foto të jashtëzakonshme në finalen e Champions në Berlin, ku Xana ngul flamurin e Barcelonës. Do të doja të bëja të njëjtën gjë me PSG-në. Vajza ime nuk do të jetë aty fizikisht, por do të jetë shpirtërisht”.
“Recuerdo una foto increíble en la final de la Champions en Berlín, donde Xana planta una bandera del Barça. Tengo el deseo de hacer lo mismo con el París Saint-Germain. No estará mi hija físicamente, pero estará espiritualmente”.
Luis Enrique | PSG
— Raúl Orvañanos (@RaulOrvananos) May 7, 2025
Dëshira e Luis Enrique sonte, pikërisht më 31 maj, është bërë realitet. Dhjetë vite më pas, për trajnerin e PSG rrethi është mbyllur: flamuri i PSG u ngul në fushën e stadiumit të Mynihut, dhe jemi të bindur se diku, atje lart, e vogla Xana bëri të njëjtën gjë.
The post Luis Enrique, 10 vite më pas mbyllet rrethi: Champions dedikuar së bijës Xana appeared first on Lapsi.al.