Procesi i numërimit të votave për zgjedhjet parlamentare të 11 majit po shkon drejt fundit. Deri në pasditen e së dielës, janë numëruar 3,704 nga gjithsej 5,225 qendra votimi, ose rreth 70% e kutive, sipas të dhënave paraprake të Komisionit Qendror të Zgjedhjeve.

Partia Socialiste e Shqipërisë kryeson bindshëm me 52.49% të votave të vlefshme, që përkthehen në 506,129 vota, duke e pozicionuar atë si forcën e parë politike në vend.

Në vend të dytë renditet koalicioni PD – Aleanca për Shqipërinë Madhështore (PD-ASHM) me 34.11% të votave, ose 328,932 vota, çka përbën një diferencë të ndjeshme me PS-në, por e konsolidon si forca kryesore opozitare.

Si ndahen mandatet (sipas projeksioneve)

Partia Socialiste (PS): 82 mandate

Koalicioni PD-ASHM: 52 mandate

Partia Socialdemokrate (PSD): 3 mandate

Partia Mundësia: 1 mandat

Koalicioni Nisma Shqipëria Bëhet: 1 mandat

Lëvizja Bashkë: 1 mandat

Performanca e partive të vogla

Në garën për vendin e tretë, Partia Socialdemokrate (PSD) ka marrë 3.62% të votave (34,931), shumë pranë saj ndodhet Koalicioni Nisma Shqipëria Bëhet me 3.53% (34,066 vota). Partia Mundësia ndjek me 2.87% (27,716 vota).

Lëvizja Bashkë ka siguruar 1.33% të votave (12,855 vota), ndërsa Koalicioni Euroatlantik (KEA) ka marrë 1.24% (12,001 vota).

Partitë e tjera si Lëvizja Atdheu, Aleanca Kombëtare Shqiptare, Aleanca Demokracia e Re dhe Koalicioni Djathtas për Zhvillim nuk kanë kaluar pragun përfaqësues dhe renditen me përqindje minimale nën 1%.

Mazhoranca e PS në horizont

Nëse trendi aktual konfirmohet edhe në pjesën e mbetur të votave, PS pritet të sigurojë shumicën absolute në Kuvend, duke pasur mundësi të qeverisë e vetme në mandatin e ri.

The post Numërohen 70% e votave në rang kombëtar: Si ndahen mandatet… appeared first on GIJOTINA.