Kryeministri izraelit Benjamin Netanyahu deklaroi se Izraeli është i përgatitur të negociojë për t’i dhënë fund konfliktit në Gaza, por vetëm nëse Hamasi dorëzon armët dhe heq dorë nga kontrolli i enklavës së rrethuar. Duke folur në fillim të një takimi javor të kabinetit, Netanyahu tha se Izraeli është i gatshëm të diskutojë një rezolutë përfundimtare sipas së cilës “udhëheqësit e Hamasit do të lejohen të largohen, ne do të garantojmë sigurinë e përgjithshme në Rripin e Gazës dhe do të mundësojmë zbatimin e planit të Trump për emigracionin vullnetar”.

Netanyahu tha se kabineti i sigurisë kishte vendosur brenda natës të përshkallëzojë presionin ushtarak. Duke mohuar akuzat se qeveria nuk i jep përparësi kthimit të pengjeve, Netanyahu tha: “Ne po punojmë dhe synojmë t’i kthejmë ata. Deri më tani, kombinimi i presionit ushtarak dhe politik ka qenë faktori i vetëm që ka siguruar lirimin e pengjeve.”

Ai tha se presioni ushtarak ndaj Hamasit po rezultonte efektiv, duke dobësuar aftësitë ushtarake dhe qeverisëse të grupit, ndërsa krijonte kushte për lirimin e pengjeve izraelite.

Të premten, Izraeli kreu një sulm ajror në Bejrut, i pari i tij që nga nënshkrimi i një armëpushimi me Hezbollahun në nëntor.

Përshkallëzimi ka ngritur shqetësime për jostabilitet më të gjerë rajonal, duke nxitur komunitetin ndërkombëtar të dënojë dhunën dhe të bëjë thirrje për përmbajtje.

The post Netanyahu: Izraeli gati të negociojë për t’i dhënë fund konfliktit në Gaza appeared first on Lapsi.al.