{"id":103569,"date":"2026-11-09T07:48:16","date_gmt":"2026-11-09T07:48:16","guid":{"rendered":"https:\/\/zennihost.com\/test\/2026\/11\/09\/shqiperia-eshte-nje-titanik-i-krimit-gazetari-holandez-qe-denoncoi-albanian-files-te-rames-rrefen-arrestimin-ne-tirane\/"},"modified":"2026-11-09T07:48:16","modified_gmt":"2026-11-09T07:48:16","slug":"shqiperia-eshte-nje-titanik-i-krimit-gazetari-holandez-qe-denoncoi-albanian-files-te-rames-rrefen-arrestimin-ne-tirane","status":"publish","type":"post","link":"https:\/\/zennihost.com\/test\/2026\/11\/09\/shqiperia-eshte-nje-titanik-i-krimit-gazetari-holandez-qe-denoncoi-albanian-files-te-rames-rrefen-arrestimin-ne-tirane\/","title":{"rendered":"\u201cShqip\u00ebria \u00ebsht\u00eb nj\u00eb Titanik i krimit\u201d, gazetari holandez q\u00eb denoncoi \u201cAlbanian Files\u201d t\u00eb Ram\u00ebs rr\u00ebfen arrestimin n\u00eb Tiran\u00eb"},"content":{"rendered":"

Nga Vincent Y\u016bsui van Gerven Oei, The Albanian Mechanism<\/a><\/strong><\/p>\n

Komisariati i Policis\u00eb Nr. 3 n\u00eb Rrug\u00ebn e Mine Pez\u00ebs ishte zyra e par\u00eb e policis\u00eb q\u00eb vizitova kur u shp\u00ebrngula n\u00eb Shqip\u00ebri n\u00eb vitin 2010. N\u00eb at\u00eb koh\u00eb, aty funksiononte Zyra e Migracionit dhe e Policis\u00eb Kufitare, ku shkova p\u00ebr t\u00eb aplikuar p\u00ebr lejen time t\u00eb par\u00eb t\u00eb q\u00ebndrimit, me afat nj\u00ebvje\u00e7ar.<\/p>\n

E kisha p\u00ebrgatitur t\u00eb gjith\u00eb dokumentacionin, ose t\u00eb pakt\u00ebn k\u00ebshtu mendoja, dhe hyra n\u00eb nj\u00eb ambient pritjeje disi t\u00eb err\u00ebt dhe t\u00eb amortizuar, pran\u00eb nd\u00ebrtes\u00ebs s\u00eb paraburgimit. Pas sportelit nuk kishte ask\u00ebnd; punonj\u00ebsit kishin dal\u00eb p\u00ebr kafe. Kur nj\u00ebri prej oficer\u00ebve u kthye \u2013 nuk m\u00eb kujtohet cili prej tyre, \u201ci miri\u201d apo \u201ci keqi\u201d \u2013 m\u00eb priti me nj\u00eb v\u00ebshtrim t\u00eb habitur dhe kureshtar. K\u00ebshtu nisi turi im i par\u00eb i madh n\u00ebp\u00ebr institucionet shtet\u00ebrore shqiptare: Ministria e Pun\u00ebs, Dhoma e Tregtis\u00eb, Zyra e Tatimeve, Bashkia e Tiran\u00ebs, n\u00eb k\u00ebrkim t\u00eb dokumenteve t\u00eb duhura.<\/p>\n

Disa vite m\u00eb von\u00eb, Edi Rama kishte ardhur n\u00eb pushtet dhe zyra e migracionit ishte zhvendosur n\u00eb nj\u00eb godin\u00eb krejt t\u00eb re n\u00eb Laprak\u00eb, me punonj\u00ebs q\u00eb duksh\u00ebm ishin trajnuar me fonde t\u00eb Bashkimit Europian. Jo vet\u00ebm ambientet dhe punonj\u00ebsit ishin m\u00eb profesional\u00eb, por edhe e gjith\u00eb procedura ishte m\u00eb e centralizuar dhe m\u00eb e thjesht\u00ebzuar. Ndon\u00ebse m\u00eb detyruan t\u00eb kthehesha disa her\u00eb, kishte nj\u00eb list\u00eb t\u00eb qart\u00eb dokumentesh, orare t\u00eb besueshme sh\u00ebrbimi, nj\u00eb ambient pritjeje dhe shum\u00eb emigrant\u00eb t\u00eb tjer\u00eb q\u00eb, nj\u00ebsoj si un\u00eb, po plot\u00ebsonin dokumentacionin. Ende m\u00eb duhej t\u00eb k\u00ebmb\u00ebngulja her\u00eb pas here dhe t\u00eb merrja me vete nj\u00eb \u201cmik\u201d, por, n\u00eb p\u00ebrgjith\u00ebsi, p\u00ebrvoja ishte disi m\u00eb pak aventureske se m\u00eb par\u00eb. Shqip\u00ebria po hapej ndaj bot\u00ebs dhe ishte e etur p\u00ebr t\u2019u b\u00ebr\u00eb pjes\u00eb e BE-s\u00eb.<\/p>\n

Koh\u00ebt e fundit, zyra e migracionit \u00ebsht\u00eb zhvendosur n\u00eb periferi t\u00eb Tiran\u00ebs, n\u00eb Sharr\u00eb, n\u00eb ambientet st\u00ebrvitore t\u00eb Forcave t\u00eb Nd\u00ebrhyrjes s\u00eb Shpejt\u00eb (FNSH). Zyra \u00ebsht\u00eb e hapur vet\u00ebm p\u00ebr nj\u00eb interval t\u00eb shkurt\u00ebr kohor, nga ora 12:00 deri n\u00eb 14:00. Kur mb\u00ebrrita atje n\u00eb mes t\u00eb ver\u00ebs, pash\u00eb nj\u00eb grup t\u00eb madh pun\u00ebtor\u00ebsh emigrant\u00eb nga Filipinet, t\u00eb mbledhur n\u00eb hijen e pak\u00ebt q\u00eb ofronte porta e hyrjes. Disa nomad\u00eb dixhital\u00eb, t\u00eb humbur e t\u00eb hutuar, q\u00ebndronin n\u00eb an\u00ebn tjet\u00ebr t\u00eb rrug\u00ebs me pluhur, t\u00eb pasigurt n\u00ebse ai ishte v\u00ebrtet institucioni i migracionit. Nuk kishte asnj\u00eb tabel\u00eb orientuese. Vet\u00eb \u201czyra\u201d, n\u00ebse mund t\u00eb quhej e till\u00eb, p\u00ebrb\u00ebhej nga dy dhoma pa asnj\u00eb shenj\u00eb identifikuese dhe thuajse t\u00eb pamb mobiluara, me disa karrige jasht\u00eb, ku mund t\u00eb d\u00ebgjoje t\u00eb sht\u00ebnat e st\u00ebrvitjes n\u00eb poligonin pran\u00eb kazermave t\u00eb policis\u00eb, nd\u00ebrsa q\u00ebndroje n\u00eb diellin p\u00ebrv\u00eblues t\u00eb mesdit\u00ebs.<\/p>\n

Megjith\u00ebse i kisha p\u00ebrgatitur t\u00eb gjitha dokumentet e renditura n\u00eb faqen zyrtare t\u00eb Ministris\u00eb s\u00eb Brendshme, n\u00eb \u00e7do vizit\u00eb t\u00eb radh\u00ebs punonj\u00ebsit, gjithnj\u00eb e m\u00eb armiq\u00ebsor\u00eb dhe t\u00eb paaft\u00eb, m\u00eb parashtronin k\u00ebrkesa t\u00eb reja, duke m\u2019i b\u00ebrtitur. Mendova t\u2019i korruptoja, por ndonj\u00ebher\u00eb thjesht nuk e meritojn\u00eb as parat\u00eb e tua.<\/p>\n

T\u00eb gjitha k\u00ebto m\u00eb kaluan n\u00ebp\u00ebr mendje kur mbr\u00ebm\u00eb u ktheva s\u00ebrish n\u00eb Komisariatin e Policis\u00eb Nr. 3 n\u00eb Rrug\u00ebn e Mine Pez\u00ebs, k\u00ebt\u00eb her\u00eb n\u00eb pjes\u00ebn e pasme t\u00eb nj\u00eb makine policie, i prangosur me Jonin, nj\u00eb kamarier nga Librazhdi, dhe me syt\u00eb e verbuar nga nj\u00eb doz\u00eb e fresk\u00ebt gazi lotsjell\u00ebs. N\u00eb fakt, k\u00ebto mendime nuk m\u00eb erdh\u00ebn n\u00eb mendje deri m\u00eb von\u00eb, kur ndodhesha n\u00eb qelin\u00eb e ndalimit, sepse kur syt\u00eb t\u00eb jan\u00eb mbushur me gaz lotsjell\u00ebs, mund vet\u00ebm t\u00eb ul\u00ebrish nga dhimbja dhe zem\u00ebrimi, nd\u00ebrsa truri praktikisht ndalon s\u00eb kryeri \u00e7do funksion m\u00eb t\u00eb lart\u00eb, si\u00e7 \u00ebsht\u00eb t\u00eb menduarit p\u00ebr nj\u00eb alegori mbi zyrat e migracionit.<\/p>\n

2011<\/strong><\/p>\n

Protestat e 21 janarit 2011, t\u00eb thirrura nga Partia Socialiste e Ram\u00ebs kund\u00ebr qeveris\u00eb s\u00eb koalicionit t\u00eb Sali Berish\u00ebs dhe Ilir Met\u00ebs, pas nj\u00eb skandali t\u00eb madh korrupsioni q\u00eb p\u00ebrfshinte ryshfete t\u00eb paguara p\u00ebr Met\u00ebn, sh\u00ebnojn\u00eb fillimin e karrier\u00ebs sime si gazetar q\u00eb shkruan p\u00ebr Shqip\u00ebrin\u00eb.<\/p>\n

M\u00eb \u00ebsht\u00eb dashur ta kujtoj shpesh k\u00ebt\u00eb episod teksa kam ndjekur p\u00ebrshkall\u00ebzimin e Revolucionit t\u00eb Flamingove gjat\u00eb jav\u00ebve t\u00eb fundit: dhun\u00ebn masive, pa dallim dhe t\u00eb paligjshme t\u00eb policis\u00eb; talljen e kryeministrit p\u00ebrball\u00eb vuajtjeve t\u00eb popullit shqiptar dhe deklaratat e tij publike gjithnj\u00eb e m\u00eb t\u00eb \u00e7ak\u00ebrdisura e t\u00eb paparashikueshme; si dhe indiferenc\u00ebn e llogaritur t\u00eb Komisionit Europian.<\/p>\n

Kjo \u00ebsht\u00eb nj\u00eb pjes\u00eb e asaj q\u00eb shkrova at\u00eb dit\u00eb, n\u00eb vitin 2011:<\/p>\n

\u201c[\u2026] U nisa nga sht\u00ebpia rreth or\u00ebs 14:30 dhe, kur mb\u00ebrrita pas Kryeministris\u00eb, takova disa miq n\u00eb rrug\u00eb, t\u00eb cil\u00ebt than\u00eb se kjo ishte nj\u00eb \u2018grusht shteti\u2019, \u2018nj\u00ebsoj si n\u00eb \u201997-\u00ebn\u2019. U drejtuam s\u00eb bashku drejt bulevardit kryesor, por u detyruam t\u00eb ktheheshim p\u00ebr shkak t\u00eb gazit lotsjell\u00ebs, i cili, i shtyr\u00eb nga era n\u00eb drejtimin ton\u00eb, na digjte fytin dhe syt\u00eb. U ngjita n\u00eb Piramid\u00eb p\u00ebr t\u00eb pasur nj\u00eb pamje t\u00eb p\u00ebrgjithshme t\u00eb situat\u00ebs dhe, brenda gjysm\u00eb ore, pash\u00eb pes\u00eb makina q\u00eb u p\u00ebrfshin\u00eb nga flak\u00ebt. Njer\u00ebzit n\u00eb sheshin p\u00ebrpara Piramid\u00ebs shkat\u00ebrruan pllakat e trotuarit p\u00ebr t\u00eb hedhur gur\u00eb drejt Policis\u00eb Ushtarake q\u00eb ruante Kryeministrin\u00eb. U d\u00ebgjuan disa shp\u00ebrthime. [\u2026]<\/p>\n

Pas rreth nj\u00eb ore hedhjesh me gur\u00eb dhe shkat\u00ebrrimit t\u00eb dy furgon\u00ebve t\u00eb policis\u00eb pran\u00eb Kryeministris\u00eb, protestuesit nis\u00ebn nj\u00eb sulm frontal ndaj Policis\u00eb Ushtarake rreth or\u00ebs 15:30, duke e detyruar at\u00eb t\u00eb t\u00ebrhiqej brenda port\u00ebs s\u00eb Kryeministris\u00eb. Dy furgon\u00ebt e policis\u00eb u dogj\u00ebn. M\u00eb pas policia nisi t\u00eb q\u00ebllonte, me sa pretendohej, me plumba gome, por n\u00eb at\u00eb moment un\u00eb u detyrova t\u00eb largohesha nga pozicioni im n\u00eb Piramid\u00eb. Teksa ecja p\u00ebr t\u00eb takuar disa miq n\u00eb nj\u00eb kafene, d\u00ebgjoja t\u00eb sht\u00ebna arm\u00ebsh (gjysm\u00ebautomatike) q\u00eb vinin nga drejtimi i bulevardit kryesor. N\u00eb televizorin e kafenes\u00eb pash\u00eb se protestuesit kishin \u00e7ar\u00eb nj\u00ebr\u00ebn prej portave t\u00eb Kryeministris\u00eb.<\/p>\n

N\u00eb k\u00ebt\u00eb moment (ora 17:30), protesta duket se ka p\u00ebrfunduar pak a shum\u00eb. Sipas News 24, bulevardi \u00ebsht\u00eb pastruar nga demonstruesit, por nd\u00ebrtesat e \u2018Twin Towers\u2019 duket se jan\u00eb pla\u00e7kitur. [\u2026]\u201d<\/p>\n

2026<\/strong><\/p>\n

Pes\u00ebmb\u00ebdhjet\u00eb vjet m\u00eb von\u00eb, dje u nisa s\u00ebrish nga sht\u00ebpia rreth or\u00ebs 14:30 p\u00ebr t\u2019u bashkuar me disa miq n\u00eb protest\u00ebn p\u00ebrpara Ministris\u00eb s\u00eb Arsimit. Ishte nj\u00eb pamje d\u00ebshp\u00ebruese. Disa mb\u00ebshtet\u00ebs t\u00eb Partis\u00eb Demokratike u drejtoheshin me fjal\u00eb fyese an\u00ebtar\u00ebve t\u00eb L\u00ebvizjes Bashk\u00eb, duke brohoritur \u201cRama n\u00eb burg, Qori n\u00eb burg\u201d dhe \u201cPosht\u00eb komunistat\u201d, nd\u00ebrsa student\u00ebt p\u00ebrpiqeshin t\u2019i mbulonin thirrjet e tyre me sloganin origjinal: \u201cRama n\u00eb burg, Berisha n\u00eb burg\u201d.<\/p>\n

Grupet nacionaliste dhe protofashiste brohorisnin \u201cShqip\u00ebria p\u00ebr shqiptar\u00ebt, posht\u00eb tradhtar\u00ebt\u201d, nd\u00ebrsa student\u00ebt u p\u00ebrgjigjeshin me \u201cNe jemi opozita\u201d. Pas gjith\u00eb k\u00ebtyre muajve, protesta dukej sikur po protestonte kund\u00ebr vetvetes, p\u00ebrpara skeletit t\u00eb zbraz\u00ebt dhe t\u00eb rr\u00ebnuar t\u00eb ministris\u00eb. T\u00eb gjith\u00eb prisnin. Prisnin di\u00e7ka. \u201cRama ik!\u201d<\/p>\n

N\u00eb nj\u00eb moment, disa protestues t\u00eb maskuar t\u00eb t\u00eb ashtuquajturit \u201cgrupi i zjarrit\u201d shtyn\u00eb drejt vij\u00ebs s\u00eb par\u00eb t\u00eb p\u00ebrballjes disa kazan\u00eb mbeturinash t\u00eb mbushur me materiale t\u00eb djegshme dhe u vun\u00eb flak\u00ebn n\u00eb m\u00ebnyr\u00eb ceremoniale. Policia u p\u00ebrgjigj me bresh\u00ebrin\u00eb e par\u00eb t\u00eb ujit nga autobot\u00ebt e ujit. E gjith\u00eb skena kishte di\u00e7ka \u00e7udit\u00ebrisht ritualistike, sikur t\u00eb ndiqte nj\u00eb skenar t\u00eb p\u00ebrs\u00ebritur dhe t\u00eb p\u00ebrsosur p\u00ebrmes provave t\u00eb shumta gjat\u00eb nj\u00eb kohe t\u00eb gjat\u00eb.<\/p>\n

Disa granata lotsjell\u00ebse mjaftuan p\u00ebr t\u2019i shtyr\u00eb protestuesit nga Rruga e Durr\u00ebsit drejt Katedrales Ortodokse. Prej andej, p\u00ebrreth cepit t\u00eb hyrjes s\u00eb nxir\u00eb t\u00eb Ministris\u00eb s\u00eb Mjedisit, drejt Bulevardit \u201cD\u00ebshmor\u00ebt e Kombit\u201d dhe Kryeministris\u00eb, ku turm\u00ebn e prisnin disa autobot\u00eb t\u00eb tjer\u00eb me uj\u00eb dhe forca policore t\u00eb armatosura.<\/p>\n

Nuk ndodhi ndonj\u00eb gj\u00eb e ve\u00e7ant\u00eb teksa muzgu ra mbi Tiran\u00eb. T\u00eb nj\u00ebjt\u00ebt t\u00eb rinj t\u00eb maskuar mblidhnin gur\u00eb dhe i hidhnin drejt policis\u00eb. Disa molotov\u00eb u hodh\u00ebn drejt autobotit t\u00eb ujit t\u00eb parkuar anash Kryeministris\u00eb. Asgj\u00eb nga k\u00ebto nuk dukej se kishte ndonj\u00eb r\u00ebnd\u00ebsi t\u00eb ve\u00e7ant\u00eb, nd\u00ebrsa grupe t\u00eb vogla protestuesish takoheshin dhe bisedonin n\u00eb bulevard.<\/p>\n

U g\u00ebzova kur dallova disa miq t\u00eb vjet\u00ebr, t\u00eb cil\u00ebt nuk i kisha par\u00eb prej koh\u00ebsh, si dhe student\u00eb t\u00eb cil\u00ebve dikur u kisha dh\u00ebn\u00eb m\u00ebsim mbi Alain Badiou-n, por q\u00eb tashm\u00eb ishin rritur dhe ishin b\u00ebr\u00eb aktivist\u00eb politik\u00eb.<\/p>\n

T\u00eb nj\u00ebjt\u00ebt t\u00eb rinj t\u00eb maskuar t\u00eb m\u00ebparsh\u00ebm po p\u00ebrpiqeshin tani ta zhvendosnin turm\u00ebn drejt nj\u00eb pozicioni mes Parkut Rinia dhe Bank\u00ebs Komb\u00ebtare. Disa njer\u00ebz p\u00ebrreth meje komentonin se ishte nj\u00eb kurth dhe nj\u00eb diversion, dhe se askush nuk ishte i sigurt n\u00ebse k\u00ebta t\u00eb rinj ishin v\u00ebrtet pjes\u00eb e protest\u00ebs apo njer\u00ebz t\u00eb infiltruar nga qeveria. Por, sapo nj\u00eb turm\u00eb nis t\u00eb l\u00ebviz\u00eb, \u00ebsht\u00eb e pamundur ta ndalosh. K\u00ebshtu p\u00ebrfundova edhe un\u00eb, s\u00eb bashku me miqt\u00eb e mi, n\u00eb trotuarin pran\u00eb Parkut Rinia. Po b\u00ebhej von\u00eb dhe askush nuk dukej se po l\u00ebvizte.<\/p>\n

Nj\u00eb mik u largua p\u00ebr t\u00eb darkuar, pastaj nj\u00eb tjet\u00ebr. Pik\u00ebrisht kur po b\u00ebhesha gati t\u00eb largohesha p\u00ebr takimin tim t\u00eb dark\u00ebs, policia nisi t\u00eb afrohej me autobot\u00ebt e ujit, nd\u00ebrsa nj\u00ebkoh\u00ebsisht po sulmonte nga t\u00eb gjitha an\u00ebt, duke kaluar p\u00ebrmes Parkut Rinia. Teksa po ecja drejt shat\u00ebrvanit, u p\u00ebrballa me rreth pes\u00eb oficer\u00eb policie t\u00eb armatosur, t\u00eb cil\u00ebt m\u00eb arrestuan.<\/p>\n

P\u00ebr nj\u00ebfar\u00eb kohe ata debatuan n\u00ebse duhej apo jo t\u00eb m\u00eb arrestonin. Disa donin t\u00eb m\u00eb linin t\u00eb lir\u00eb, t\u00eb tjer\u00eb k\u00ebmb\u00ebngulnin t\u00eb m\u00eb merrnin me vete. Asnj\u00ebri prej tyre nuk mund t\u00eb m\u00eb jepte ndonj\u00eb arsye konkrete. N\u00eb fund, dy prej tyre m\u00eb shoq\u00ebruan drejt nj\u00eb furgoni policie.<\/p>\n

Nj\u00eb gazetare tjet\u00ebr pa q\u00eb po arrestohesha dhe nisi t\u00eb th\u00ebrriste emrin tim, nd\u00ebrsa po m\u00eb filmonte teksa m\u00eb largonin. Oficeri q\u00eb q\u00ebndronte n\u00eb t\u00eb majt\u00ebn time e sp\u00ebrkati me forc\u00eb n\u00eb fytyr\u00eb me gaz lotsjell\u00ebs, nd\u00ebrsa m\u00eb hodhi edhe mua nj\u00eb doz\u00eb. U verbova menj\u00ebher\u00eb.<\/p>\n

M\u00eb fut\u00ebn me forc\u00eb n\u00eb furgonin e policis\u00eb dhe kontrolluan trupin dhe sendet e mia personale. U identifikova, por, natyrisht, nj\u00eb shkrimtar holandezo-kinez q\u00eb shkruan p\u00ebr Shqip\u00ebrin\u00eb \u00ebsht\u00eb nj\u00eb objektiv i leht\u00eb p\u00ebr t\u2019u tallur. \u201cEdhe un\u00eb kam shkruar nj\u00eb lib\u00ebr!\u201d, m\u00eb b\u00ebrtiti nj\u00ebri prej tyre. \u201cDo t\u00eb shkruash edhe p\u00ebr ne?\u201d Nj\u00eb oficer tjet\u00ebr, ndoshta disi m\u00eb i vet\u00ebdijsh\u00ebm p\u00ebr situat\u00ebn, u tha t\u00eb tjer\u00ebve t\u00eb pushonin.<\/p>\n

M\u00eb nxor\u00ebn nga furgoni, m\u00eb fut\u00ebn n\u00eb nj\u00eb makin\u00eb policie, m\u00eb vun\u00eb prangat duke m\u00eb lidhur me Jonin dhe u nis\u00ebm drejt komisariatit. Nga l\u00ebvizjet e makin\u00ebs mund t\u00eb kuptoja se po shkonim drejt Komisariatit t\u00eb Policis\u00eb Nr. 3 n\u00eb Rrug\u00ebn e Mine Pez\u00ebs.<\/p>\n

Kur hyra n\u00eb komisariat, ende nuk shihja dhe ndieja dhimbje t\u00eb tmerrshme. Brenda k\u00ebrkova ndihm\u00eb mjek\u00ebsore nga kushdo q\u00eb ndodhej aty, pasi kjo ishte nj\u00eb nga t\u00eb drejtat e mia. M\u00eb lejuan ta laja shkurtimisht fytyr\u00ebn me uj\u00eb t\u00eb rrjedhsh\u00ebm, por ende mezi shihja. Askush nuk m\u00eb lexoi t\u00eb drejtat dhe as nuk m\u00eb informoi p\u00ebr arsyen e arrestimit. M\u00eb vendos\u00ebn n\u00eb nj\u00eb qeli ndalimi.<\/p>\n

Dhimbja ther\u00ebse dhe verbimi i shkaktuar nga gazi lotsjell\u00ebs filluan dal\u00ebngadal\u00eb t\u00eb zbeheshin, duke u shnd\u00ebrruar n\u00eb nj\u00eb dhimbje koke t\u00eb mpir\u00eb dhe t\u00eb p\u00ebrziera. Por, t\u00eb pakt\u00ebn, tashm\u00eb mund t\u00eb shihja p\u00ebrs\u00ebri. Shpejt kuptova se ndodhesha n\u00eb nj\u00eb lloj qelie \u201cluksoze\u201d, t\u00eb cil\u00ebn ma kishin rezervuar p\u00ebr shkak t\u00eb pasaport\u00ebs sime t\u00eb huaj. Disa oficer\u00eb hyn\u00eb brenda p\u00ebr t\u00eb b\u00ebr\u00eb shaka me \u201ctelevizorin\u201d (q\u00eb, natyrisht, nuk ekzistonte).<\/p>\n

M\u00eb vizituan oficer\u00eb t\u00eb gradave t\u00eb ndryshme, me dhe pa uniform\u00eb, dhe vazhdimisht pa asnj\u00eb shenj\u00eb identifikimi, t\u00eb cil\u00ebt m\u00eb k\u00ebrkonin t\u00eb dh\u00ebnat personale. Shkrova emrin e babait, t\u00eb n\u00ebn\u00ebs dhe emrin tim n\u00eb letra ngjit\u00ebse, copa t\u00eb grisura letre dhe sh\u00ebnime n\u00eb telefon.<\/p>\n

Nj\u00eb oficer hyri brenda duke b\u00ebrtitur se kishin pamje filmike ku un\u00eb hidhja gur\u00eb drejt policis\u00eb dhe se \u201cshefi\u201d (duke treguar tavanin) do t\u00eb vendoste p\u00ebr fatin tim. K\u00ebrkova t\u00eb telefonoja ambasad\u00ebn holandeze, por k\u00ebrkesa ime u refuzua. Edhe pas disa or\u00ebsh, askush ende nuk m\u00eb kishte lexuar t\u00eb drejtat dhe nuk m\u00eb kishte informuar p\u00ebr vepr\u00ebn penale q\u00eb pretendohej se kisha kryer.<\/p>\n

M\u00eb n\u00eb fund, nj\u00eb oficer hyri me nj\u00eb cop\u00eb let\u00ebr: t\u00eb drejtat e mia. Dokumenti nuk kishte dat\u00eb dhe as or\u00ebn se kur m\u00eb ishin komunikuar k\u00ebto t\u00eb drejta. Pa dyshim, k\u00ebto t\u00eb dh\u00ebna do t\u00eb plot\u00ebsoheshin m\u00eb von\u00eb, n\u00eb m\u00ebnyr\u00eb q\u00eb t\u00eb p\u00ebrputheshin me or\u00ebn q\u00eb do t\u00eb sh\u00ebnonin n\u00eb regjistrin e ndalimit. E firmosa; dhimbja kishte shuar \u00e7do d\u00ebshir\u00eb p\u00ebr t\u00eb luftuar apo p\u00ebr t\u00eb kund\u00ebrshtuar padrejt\u00ebsin\u00eb q\u00eb mund t\u00eb kisha ndier. N\u00eb vend t\u00eb tyre, kishte ardhur nj\u00eb ndjenj\u00eb tjet\u00ebr: nj\u00eb ndjenj\u00eb e tmerrshme.<\/p>\n

Sepse n\u00eb momentin kur pash\u00eb oficer\u00ebt e policis\u00eb q\u00eb po afroheshin drejt meje p\u00ebrpara Taiwan-it, e dija: do t\u00eb shkruaj p\u00ebr k\u00ebt\u00eb. Tani e di se si duhet ta p\u00ebrfundoj librin tim \u2013 n\u00eb burg.<\/p>\n

Q\u00eb nga ai \u00e7ast e tutje, pavar\u00ebsisht dhimbjes, interesi im i vet\u00ebm ishte t\u00eb mbaja mend detajet, t\u00eb kujtoja sa m\u00eb shum\u00eb prej tyre: talljet e oficer\u00ebve t\u00eb policis\u00eb; ndjesin\u00eb e k\u00ebmb\u00ebs s\u00eb Jonit pran\u00eb k\u00ebmb\u00ebs sime, nd\u00ebrsa makina e policis\u00eb i binte boris\u00eb mes trafikut; shkall\u00ebt e vogla n\u00eb hyrje t\u00eb komisariatit; pes\u00eb pal\u00ebt e \u00e7izmeve q\u00eb pash\u00eb kur munda t\u00eb hapja syt\u00eb p\u00ebr her\u00eb t\u00eb par\u00eb; drurin e stolit n\u00eb qeli, i b\u00ebr\u00eb nga t\u00eb nj\u00ebjtat d\u00ebrrasa q\u00eb p\u00ebrdoren p\u00ebr tarracat e kafeneve; der\u00ebn e gdhendur me emra vendesh (Dibra, Kuk\u00ebsi, Hasi), nofka dhe nj\u00eb svastik\u00eb; telat elektrik\u00eb t\u00eb zbuluar; guask\u00ebn e tualetit t\u00eb mbushur me bishta cigaresh; tryez\u00ebn n\u00eb korridorin jasht\u00eb qelis\u00eb sime, ku dy oficer\u00eb, nj\u00ebri ende i veshur me pajisjet mbrojt\u00ebse, plot\u00ebsonin dokumentet e mia me shkrim dore t\u00eb ngath\u00ebt, pa pasur para syve as edhe nj\u00eb kompjuter t\u00eb vet\u00ebm; \u00e7ant\u00ebn dhe shishen time t\u00eb ujit n\u00eb dysheme, helmet\u00ebn e bardh\u00eb dhe mask\u00ebn kund\u00ebr gazit mbi tryez\u00eb; rripin e Jonit; mb\u00ebshtjell\u00ebsen e \u00e7okollat\u00ebs Milka q\u00eb kisha ngr\u00ebn\u00eb p\u00ebrpara Ministris\u00eb; shishe t\u00eb ndryshme uji t\u00eb kthyera n\u00eb tavll\u00eb duhani; nj\u00eb televizor pa lidhje, n\u00eb t\u00eb cilin shfaqej vet\u00ebm menuja e kanaleve dixhitale.<\/p>\n

Oficer\u00eb t\u00eb ndrysh\u00ebm m\u00eb fotografuan disa her\u00eb, gjithmon\u00eb me telefonat e tyre personal\u00eb dhe n\u00eb poza t\u00eb ndryshme, me dhe pa mask\u00ebn time kund\u00ebr gazit. Por, n\u00eb at\u00eb pik\u00eb, nuk m\u00eb interesonte aspak drejt\u00ebsia, as p\u00ebr veten dhe as p\u00ebr dik\u00eb tjet\u00ebr. Mendoja vet\u00ebm p\u00ebr nj\u00eb gj\u00eb: si ta shkruaja paragrafin e par\u00eb t\u00eb k\u00ebtij teksti.<\/p>\n

Psikoterapisti im dikur m\u00eb kishte ndihmuar t\u00eb kuptoja se shkrimi \u00ebsht\u00eb nj\u00eb strategji p\u00ebrballimi p\u00ebr mua, dhe dukej se kjo strategji kishte hyr\u00eb n\u00eb veprim me gjith\u00eb forc\u00ebn e saj, teksa ecja n\u00eb rrath\u00eb t\u00eb vegj\u00ebl n\u00eb qelin\u00eb time VIP.<\/p>\n

N\u00eb nj\u00eb moment, risia e mb\u00ebrritjes sime kishte humbur dhe un\u00eb kisha firmosur nj\u00eb mori dokumentesh, ndaj t\u00eb cilave \u00e7do avokat i aft\u00eb, pa dyshim, do t\u00eb kishte paraqitur kund\u00ebrshtime. Gjat\u00eb or\u00ebve t\u00eb m\u00ebvonshme t\u00eb pritjes pa asnj\u00eb angazhim (ata mund t\u00eb m\u00eb mbanin deri n\u00eb pes\u00eb or\u00eb), u p\u00ebrpoqa t\u00eb nisja nj\u00eb bised\u00eb me oficerin e ri q\u00eb m\u00eb ruante. Le ta quajm\u00eb Bledi.<\/p>\n

Bledi ishte n\u00eb fillim t\u00eb t\u00eb nj\u00ebzetave dhe vinte nga jugu i vendit. Kishte vet\u00ebm dy muaj q\u00eb ishte b\u00ebr\u00eb pjes\u00eb e forcave t\u00eb policis\u00eb dhe e kishin transferuar n\u00eb Tiran\u00eb kur nis\u00ebn protestat studentore. Bisedat tona nd\u00ebrpriteshin shpesh nga oficer\u00eb t\u00eb tjer\u00eb q\u00eb hynin n\u00eb korridor, por sapo mbetej s\u00ebrish vet\u00ebm, ai tregohej i sjellsh\u00ebm dhe i gatsh\u00ebm p\u00ebr t\u00eb biseduar. Po b\u00ebhej von\u00eb dhe ai ishte n\u00eb fund t\u00eb nj\u00eb turni q\u00eb, n\u00eb thelb, kishte zgjatur 24 or\u00eb. T\u00eb h\u00ebn\u00ebn mund t\u00eb kthehej n\u00eb sht\u00ebpi p\u00ebr dy jav\u00eb.<\/p>\n

Pas hekurave t\u00eb der\u00ebs s\u00eb qelis\u00eb sime u shfaq nj\u00eb fytyr\u00eb tjet\u00ebr, ajo e nj\u00eb oficereje t\u00eb policis\u00eb gjyq\u00ebsore q\u00eb fliste anglisht. Quhej Alba. Ajo do t\u00eb merrte deklarat\u00ebn time. Alba m\u00eb pyeti n\u00ebse d\u00ebshiroja nj\u00eb avokat dhe un\u00eb i thash\u00eb se doja t\u00eb telefonoja ambasad\u00ebn holandeze. Kjo i shkaktoi nj\u00eb shprehje t\u00eb leht\u00eb paniku n\u00eb fytyr\u00eb. Pasi nuk arrit\u00ebn ta kontaktonin ambasad\u00ebn n\u00eb at\u00eb or\u00eb, m\u00eb n\u00eb fund m\u00eb lejuan t\u00eb p\u00ebrdorja telefonin tim p\u00ebr t\u00eb telefonuar drejtp\u00ebrdrejt sekretarin e ambasad\u00ebs.<\/p>\n

Kjo duket se pati nj\u00ebfar\u00eb ndikimi dhe, m\u00eb n\u00eb fund, m\u2019u lejua t\u00eb jepja deklarat\u00ebn. E ndoqa Bledin lart, ku, n\u00eb fund t\u00eb korridorit, nj\u00eb dritare e madhe lejonte t\u00eb hynte aj\u00ebr i fresk\u00ebt mbr\u00ebmjeje. U ndala p\u00ebr ta thithur at\u00eb. \u201cQ\u00ebndro larg dritares\u201d, m\u00eb tha Bledi. \u201cHer\u00ebn e fundit nj\u00eb reper u arratis nga aty dhe, n\u00ebse arratisesh edhe ti, at\u00ebher\u00eb m\u00eb mir\u00eb t\u00eb hidhem edhe un\u00eb.\u201d<\/p>\n

Tryeza e Alb\u00ebs ishte e mbuluar me dokumente t\u00eb sh\u00ebnuara \u201csekret\u201d dhe \u201ckonfidenciale\u201d. Lidhja e saj me internetin nuk funksiononte. Tryeza ngjitur ishte mbushur me shishe me solucion p\u00ebr shp\u00eblarjen e syve.<\/p>\n

\u201cDo t\u00eb m\u00eb duhej v\u00ebrtet nj\u00ebra prej tyre\u201d, b\u00ebra shaka.<\/p>\n

\u201cT\u00eb konfiskuara nga protestuesit\u201d, m\u00eb tha ajo.<\/p>\n

Kush i konfiskon mjetet mjek\u00ebsore? P\u00ebr t\u00eb provuar \u00e7far\u00eb?<\/p>\n

N\u00eb mur varej nj\u00eb punim n\u00eb dru, n\u00eb stilin e realizmit socialist, q\u00eb paraqiste nj\u00eb mal\u00ebsor nga veriu i Shqip\u00ebris\u00eb duke gdhendur lule rreth nj\u00eb ylli komunist.<\/p>\n

\u201cT\u00eb p\u00eblqen ajo gj\u00ebja?\u201d, m\u00eb pyeti kur m\u00eb kapi duke e par\u00eb.<\/p>\n

\u201cKam shkruar nj\u00eb lib\u00ebr p\u00ebr monumentet komuniste\u201d, i rr\u00ebfeva.<\/p>\n

Pasi p\u00ebrfundoi dokumentacioni zyrtar, avokatja e caktuar nga shteti m\u00eb pyeti, nd\u00ebrsa oficer\u00ebt e policis\u00eb ishin ende n\u00eb dhom\u00eb, se \u00e7far\u00eb mendoja p\u00ebr protestat.<\/p>\n

\u201cMos u shqet\u00ebso\u201d, m\u00eb tha ajo, \u201cajo e ka mbaruar shkrimin. Mund t\u00eb flasim lirisht.\u201d<\/p>\n

\u201cNuk do t\u00eb t\u00eb p\u00eblqej\u00eb kjo pjesa e fundit\u201d, m\u00eb tha Alba. Telefoni im do t\u00eb sekuestrohej si \u201cprov\u00eb\u201d.<\/p>\n

\u201cMerr frym\u00eb pak\u201d, m\u00eb tha avokatja. \u201cNuk ke \u00e7far\u00eb t\u00eb b\u00ebsh. Thjesht firmosi dokumentet.\u201d<\/p>\n

Isha i fundit p\u00ebr at\u00eb nat\u00eb dhe Alba ishte e lumtur q\u00eb m\u00eb n\u00eb fund mund t\u00eb shkonte n\u00eb sht\u00ebpi, pasi kishte dy muaj q\u00eb ishte n\u00eb leje mjek\u00ebsore pa pages\u00eb.<\/p>\n

\u201cTani je i lir\u00eb t\u00eb largohesh.\u201d<\/p>\n

Nuk mora asnj\u00eb kopje t\u00eb dokumentit pa dat\u00eb p\u00ebr t\u00eb drejtat e mia, t\u00eb cilin e kisha firmosur m\u00eb her\u00ebt, t\u00eb procesverbalit apo t\u00eb ndonj\u00eb dokumenti q\u00eb lidhej me sekuestrimin e telefonit tim. Por kisha nj\u00eb let\u00ebr ngjit\u00ebse me numrin e telefonit t\u00eb avokates. Sigurisht, mund t\u00eb kisha provuar t\u00eb kontaktoja nj\u00eb avokat m\u00eb t\u00eb aft\u00eb. Por isha i lodhur, i uritur dhe doja t\u00eb shkoja n\u00eb sht\u00ebpi. Trupat tan\u00eb gjithmon\u00eb na tradhtojn\u00eb.<\/p>\n

Bledi m\u00eb shoq\u00ebroi s\u00ebrish posht\u00eb. M\u00eb lejoi t\u00eb ulesha n\u00eb korridor, n\u00eb vend q\u00eb t\u00eb kthehesha n\u00eb qeli.<\/p>\n

\u201cPo tani?\u201d e pyeta.<\/p>\n

\u201cTani presim.\u201d<\/p>\n

\u201c\u00c7far\u00eb presim?\u201d<\/p>\n

\u201cQ\u00eb t\u00eb t\u00eb lejojn\u00eb t\u00eb largohesh, q\u00eb edhe un\u00eb t\u00eb shkoj n\u00eb sht\u00ebpi.\u201d<\/p>\n

Joni na u bashkua p\u00ebr nj\u00eb cigare. Ai kishte marr\u00eb nj\u00eb gjob\u00eb prej 5 mij\u00eb lek\u00ebsh p\u00ebr bllokim t\u00eb rrug\u00ebs. \u201cA mund t\u00eb lexosh \u00e7far\u00eb shkruan k\u00ebtu?\u201d, m\u00eb pyeti. Babai i tij po e priste tashm\u00eb jasht\u00eb.<\/p>\n

Her\u00eb pas here, oficer\u00eb t\u00eb ndrysh\u00ebm hynin dhe dilnin. Nj\u00ebri prej tyre, q\u00eb me sa duket kishte trajtuar \u00e7\u00ebshtjen e Jonit, i tregoi k\u00ebtij t\u00eb fundit n\u00eb m\u00ebnyr\u00eb k\u00ebrc\u00ebnuese t\u00eb gjith\u00eb dokumentacionin, p\u00ebrfshir\u00eb fotografi bardhezi me rezolucion t\u00eb lart\u00eb nga protestat.<\/p>\n

\u201cKemi pamje filmike shum\u00eb t\u00eb mira\u201d, e ngacmoi.<\/p>\n

\u201cI keni marr\u00eb me dron\u00eb ato pamje?\u201d, pyeta un\u00eb.<\/p>\n

\u201cDi\u00e7ka e till\u00eb, di\u00e7ka e ngjashme me dronin!\u201d<\/p>\n

Oficeri vazhdoi ta intimidonte Jonin n\u00eb korridor.<\/p>\n

\u201cI ke harruar t\u00eb gjitha gj\u00ebrat q\u00eb Edi Rama ka p\u00ebrmir\u00ebsuar p\u00ebr ne? Rrug\u00ebt m\u00eb t\u00eb mira, pagat m\u00eb t\u00eb larta, arsimin m\u00eb t\u00eb mir\u00eb? I ke harruar t\u00eb gjitha k\u00ebto? Ti thjesht b\u00ebrtet \u2018Rama ik!\u2019 pas gjith\u00eb atyre q\u00eb ka b\u00ebr\u00eb p\u00ebr ty! Nuk e di as vet\u00eb \u00e7far\u00eb k\u00ebrkon!\u201d<\/p>\n

Joni nuk u ndikua aspak.<\/p>\n

\u201cUn\u00eb thjesht dua t\u00eb ndryshoj\u00eb qeveria.\u201d<\/p>\n

Oficeri u kthye nga un\u00eb.<\/p>\n

\u201cTi, shkrimtar, a nuk kam t\u00eb drejt\u00eb?\u201d<\/p>\n

\u201cPyetja v\u00ebrtet interesante \u00ebsht\u00eb se p\u00ebrse kaq shum\u00eb njer\u00ebz duket se i kan\u00eb harruar t\u00eb gjitha t\u00eb mirat q\u00eb Rama, me sa duket, ka b\u00ebr\u00eb p\u00ebr ta. Pse mendon se ndodh kjo?\u201d, iu p\u00ebrgjigja.<\/p>\n

Pak m\u00eb von\u00eb, kur mbet\u00ebm s\u00ebrish vet\u00ebm, e pyeta Bledin:<\/p>\n

\u201cEdhe ti ke qen\u00eb jasht\u00eb, apo ke q\u00ebndruar vet\u00ebm n\u00eb zyr\u00eb?\u201d<\/p>\n

\u201cSigurisht q\u00eb kam qen\u00eb\u201d, u p\u00ebrgjigj ai. \u201cN\u00eb fakt, kjo \u00ebsht\u00eb dita ime e par\u00eb brenda.\u201d<\/p>\n

\u201cSi ishte t\u00eb ishe n\u00eb an\u00ebn tjet\u00ebr?\u201d<\/p>\n

\u201cAdrenalin\u00eb. Shum\u00eb adrenalin\u00eb.\u201d<\/p>\n

Ai b\u00ebri nj\u00eb pauz\u00eb.<\/p>\n

\u201c\u00c7far\u00eb mendon se do t\u00eb ndodh\u00eb m\u00eb pas?\u201d<\/p>\n

Nuk ishte i pari q\u00eb ma b\u00ebnte k\u00ebt\u00eb pyetje at\u00eb nat\u00eb.<\/p>\n

Askush nuk mund ta p\u00ebrballoj\u00eb k\u00ebt\u00eb nivel dhune p\u00ebr nj\u00eb koh\u00eb t\u00eb gjat\u00eb, as protestuesit dhe as policia. T\u00eb gjith\u00eb, n\u00eb \u00e7do an\u00eb, jan\u00eb t\u00eb rraskapitur. Ende nuk ka asnj\u00eb perspektiv\u00eb p\u00ebr nj\u00eb bashk\u00ebpunim politik q\u00eb do t\u00eb mund t\u00eb thyente kontrollin e hekurt t\u00eb Partis\u00eb Socialiste mbi pushtetin.<\/p>\n

\u201cNuk ka alternativ\u00eb\u201d, thon\u00eb nd\u00ebrkomb\u00ebtar\u00ebt, teksa pajtohen me \u201cstabilitetin\u201d q\u00eb ofron Rama. Dhe kan\u00eb t\u00eb drejt\u00eb: nuk ka nj\u00eb alternativ\u00eb t\u00eb besueshme. Nuk ekziston asnj\u00eb person apo parti p\u00ebr t\u00eb cil\u00ebn njer\u00ebzit t\u00eb besojn\u00eb se \u00ebsht\u00eb n\u00eb gjendje t\u00eb marr\u00eb drejtimin e k\u00ebsaj p\u00ebrbind\u00ebshi shtet\u00ebror, t\u00eb k\u00ebsaj organizate gjigante mafioze, \u00e7do fije dhe \u00e7do kapilar i s\u00eb cil\u00ebs \u00ebsht\u00eb i p\u00ebrlyer me trafik, korrupsion dhe intimidim.<\/p>\n

Shqip\u00ebria \u00ebsht\u00eb nj\u00eb Titanik i krimit, q\u00eb ende \u00ebsht\u00eb n\u00eb k\u00ebrkim t\u00eb ajsbergut t\u00eb vet.<\/p>\n

M\u00eb n\u00eb fund, pik\u00ebrisht pes\u00eb or\u00eb pasi m\u00eb kishin regjistruar si t\u00eb ndaluar, u lirova. Jasht\u00eb m\u00eb prit\u00ebn miqt\u00eb e mi, t\u00eb cil\u00ebt kishin sjell\u00eb ushqimet e mbetura nga darka festive q\u00eb kisha humbur, si dhe nj\u00eb shishe t\u00eb madhe me ujin tim t\u00eb preferuar. S\u00eb bashku u kthyem n\u00eb Taverna e Kasapit p\u00ebr t\u00eb ngr\u00ebn\u00eb \u00ebmb\u00eblsir\u00ebn q\u00eb kishte mbetur.<\/p>\n

The post \u201cShqip\u00ebria \u00ebsht\u00eb nj\u00eb Titanik i krimit\u201d, gazetari holandez q\u00eb denoncoi \u201cAlbanian Files\u201d t\u00eb Ram\u00ebs rr\u00ebfen arrestimin n\u00eb Tiran\u00eb<\/a> appeared first on GIJOTINA<\/a>.<\/p>","protected":false},"excerpt":{"rendered":"

Nga Vincent Y\u016bsui van Gerven Oei, The Albanian Mechanism Komisariati i Policis\u00eb Nr. 3 n\u00eb Rrug\u00ebn e Mine Pez\u00ebs ishte zyra e par\u00eb e policis\u00eb q\u00eb vizitova kur u shp\u00ebrngula n\u00eb Shqip\u00ebri n\u00eb vitin 2010. N\u00eb at\u00eb koh\u00eb, aty funksiononte Zyra e Migracionit dhe e Policis\u00eb Kufitare, ku shkova p\u00ebr t\u00eb aplikuar p\u00ebr lejen time […]<\/p>\n","protected":false},"author":0,"featured_media":0,"comment_status":"open","ping_status":"open","sticky":false,"template":"","format":"standard","meta":{"footnotes":""},"categories":[1],"tags":[],"class_list":["post-103569","post","type-post","status-publish","format-standard","hentry","category-uncategorized"],"_links":{"self":[{"href":"https:\/\/zennihost.com\/test\/wp-json\/wp\/v2\/posts\/103569","targetHints":{"allow":["GET"]}}],"collection":[{"href":"https:\/\/zennihost.com\/test\/wp-json\/wp\/v2\/posts"}],"about":[{"href":"https:\/\/zennihost.com\/test\/wp-json\/wp\/v2\/types\/post"}],"replies":[{"embeddable":true,"href":"https:\/\/zennihost.com\/test\/wp-json\/wp\/v2\/comments?post=103569"}],"version-history":[{"count":0,"href":"https:\/\/zennihost.com\/test\/wp-json\/wp\/v2\/posts\/103569\/revisions"}],"wp:attachment":[{"href":"https:\/\/zennihost.com\/test\/wp-json\/wp\/v2\/media?parent=103569"}],"wp:term":[{"taxonomy":"category","embeddable":true,"href":"https:\/\/zennihost.com\/test\/wp-json\/wp\/v2\/categories?post=103569"},{"taxonomy":"post_tag","embeddable":true,"href":"https:\/\/zennihost.com\/test\/wp-json\/wp\/v2\/tags?post=103569"}],"curies":[{"name":"wp","href":"https:\/\/api.w.org\/{rel}","templated":true}]}}