Apeli i GJKKO konfirmon dënimin me 10 vite burg për Robert Myftarin akuzohen për trafik droge dhe grup kriminal –

Gjykata e Posaçme e Apelit për Korrupsionin dhe Krimin e Organizuar shpalli sot, vendimin për çështjen penale ndaj të pandehurit Robert Myftari.

Trupi gjykues i përbërë nga gjyqtarët Dhimitër Lara (kryesues), Daniela Shirka dhe Tereza Merkaj vendosi të lërë në fuqi vendimin e Shkallës së Parë.

Myftari u shpall fajtor për veprën penale “Trafikimi i narkotikëve”, në bashkëpunim dhe në kuadër të një grupi të strukturuar kriminal, mbetur në tentativë. Për këtë akuzë, ai u dënua me 10 vite burgim.

Gjithashtu, ai u shpall fajtor për veprën penale “Grupi i strukturuar kriminal”, për të cilën iu caktua një dënim prej 2 vitesh burgim. Në zbatim të nenit 55 të Kodit Penal, gjykata vendosi një dënim të vetëm prej 10 vitesh burgim.

Gjykata urdhëroi që Myftari ta vuajë dënimin në burgun e sigurisë së lartë, duke nisur nga dita e arrestimit.

Po ashtu, u vendos konfiskimi i mjetit lundrues tip gomone, i sekuestruar në nëntor 2015 me ngarkesë rreth 800 kg lëndë narkotike, i cili do të kalojë në favor të shtetit.