Policia e Shkodrës ka zbardhur vrasjen me lëndë eksplozive të shtetasit Hysni Ymeri, ngjarje kjo e ndodhur më 29 dhjetor në lagjen ‘Manush Alimani’. Si rezultat uniformat blu kanë identifikuar dhe vënë në pranga 4 shtetas, të dyshuar si autorë të kësaj vrasjeje. Më konkretisht u arrestuan shtetasit Gerti Bushati 27 vjeç, Ergys Ibrahimi 27 vjeç, Edison Hasaj 25 vjeç dhe Gjergji Zefi 24 vjeç.

Policia thotë se ndalimi i tyre u bë pasi ka dyshime të bazuara dhe të mbështetura në prova se këta persona, kundrejt pagesës, në bashkëpunim me njëri-tjetrin, më datë 29 dhjetor, duke përdorur lëndë eksplozive (e dyshuar me telekomandim në distancë), kanë shpërthyer panelin elektrik të pallatit ku banonte shtetasi Hysni Ymeri.

Gjatë veprimeve procedurale, kontrolleve të vendeve dhe ambienteve, si dhe kontrolleve personale, janë gjetur dhe sekuestruar, në cilësinë e provave materiale: 28 celularë, 1 automjet ‘Mercedes-Benz’, rrobat e veshura nga autori i dyshuar që ka vendosur lëndën eksplozive, municion luftarak, një sasi monetare në lekë dhe euro, një sasi lënde narkotike, një sasi lënde kokaine, 3 pajisje gjurmuese GPS, 2 kamera sigurie dhe 1 laptop.

Policia dyshon se në këtë ngjarje të rëndë kanë qenë të përfshirë edhe persona të tjerë dhe thekson se po punohet për identifikimin dhe kapjen e tyre si dhe për zbardhjen e motiveve të kësaj ngjarje.

Materialet procedurale iu referuan Prokurorisë së Shkodrës për veprat penale: ‘Vrasja me paramendim’, e kryer në bashkëpunim; ‘Shkatërrimi i pronës me eksploziv’; ‘Mbajtja pa leje dhe prodhimi i armëve, armëve shpërthyese dhe i municionit’; ‘Prodhimi dhe shitja e narkotikëve’, e kryer në bashkëpunim; si dhe ‘Prishja e qetësisë publike’.

Ditën e ngjarjes policia fillimisht njoftoi se shtetasi Ymeri kishte ndërruar jetë si pasoje e shpërthimit të panelit të matësve elektrike të pallatit. Por ky version i policisë u kundërshtua nga OSHEE, e cila përmes një reagimi për mediat mohoi që shpërthimi kishte ndodhur për shkak të kutisë së matësve në pallat, pasi sahati nuk shpërthen, por shkakton zjarr.

Dyshimet për një atentat të mundshëm u ngritën që kur ndodhi ngjarja dhe u konfirmuan këtë të premte nga Policia e Shkodrës. Viktima Hysni Ymeri jetonte në katin e katërt të këtij pallati. Shpërthimi ndodhi pasi Hysni Ymeri zbriti në katin e parë duke i shkaktuar plagë të shumta në trup të cilat shkaktuan edhe vdekjen e tij, disa minuta më pas në spitalin e Shkodrës.

The post Zbardhet vrasja misterioze në Shkodër, policia arreston katër persona appeared first on Lapsi.al.