Inter shkon në Mynih për të luajtur ndeshjen e parë të çerekfinales së Champions kundër një Bayern me shumë mungesa: Inzaghi gjithsesi nuk nis si favorit sipas parashikimeve, por mungesat e rëndësishme të bavarezëve (sidomos Musiala, Neuer, Upamecano dhe Davies) e bëjnë të detyrueshme të besosh. Një mbrëmje e madhe në Champions, pasi fituesit e përjetshëm të Kupës me Veshë të Mëdhenj kanë përballë dështuesin e përhershëm në Europë, në super-ndeshjen e së martës, teksa Arsenal pret Real Madrid në “Emirates” për ndeshjen e parë të çerekfinales.

“CALHA DHE DIMARCO NË DYSHIM, BASTONI E KALON”

Si për Kompany ashtu edhe për teknikun Inzaghi zgjedhjet e formacionit do të varen nga lojtarët që do të arrijnë të rikuperohen në momentin e fundit. Për Inter, dyshimet lidhen veçanërisht me tre emra: Bastoni, Dimarco dhe Calhanoglu. “Në Parma dolën për disa probleme të vogla. Kemi disa shqetësime si të gjitha skuadrat që luajnë kaq shumë,” tha Inzaghi në konferencën për shtyp para ndeshjes, duke iu përgjigjur me ton të ashpër kritikave të marra pas barazimit ndaj Parmës: “Pas barazimit të së dielës u tha gjithçka: e vërteta është se katër zëvendësime ishin të detyruara për shkak dëmtimesh.”

Megjithatë trajneri i Inter do t’i kërkojë përpjekje ekstra besnikëve të tij: Calhanoglu, përveç ndonjë surprize, do të detyrohet të shtrëngojë dhëmbët, pasi Asllani është i pezulluar dhe Zielinski i dëmtuar. Pas goditjes në gju të marrë ndaj Parmës, qendërmbrojtësi i kombëtares është stërvitur me grupin dhe do të jetë rregullisht në krahun e majtë të treshes mbrojtëse, e plotësuar nga Acerbi në qendër dhe Pavard në të djathtë. Dimarco, nga ana tjetër, vjen në këtë çerekfinale pas dy ditësh stërvitjeje të diferencuar, ndaj është shumë e mundur që të niset nga stoli, me Carlos Augusto titullar. Në sulmin e Inter konfirmohet Lautaro, i dalë shumë i nervozuar nga “Tardini”, përkrah Thuram.

“BASTI” I ROTACIONEVE

Edhe Inter pra do t’i duhet të përballet me mungesa të rëndësishme (si Dumfries dhe Zielinski) ose lojtarë jo në gjendje optimale (“Gjej veten me 14-15 lojtarë dhe flitet vetëm për mungesat e Bayern”, tha Inzaghi në prag të ndeshjes), por ky është momenti në të cilin puna e detajuar me rotacionet e zbatuar gjatë gjithë sezonit nga Inzaghi mund të bëjë diferencën. Trajneri është sulmuar në më shumë se një rast nga kritikat e ashpra për humbjen e pikëve në kampionat për të “ruajtur” titullarët.

Ja pra, sot ato pikë të lëna rrugës vënë në dyshim fitimin e titullit, por me një kualifikim të mundshëm, mund të mos shihen më si raste të humbura, por si një lloj investimi. Ose ndoshta do të ishte më mirë të thuhej si një bast mbi vetveten që Inter dhe trajneri i tij kanë dashur të bëjnë në fillim të vitit, duke mos zgjedhur një kompeticion për t’i dhënë përparësi, por duke kërkuar të fitojnë gjithçka. Në fund të sezonit do të bëhen llogaritë: kufiri mes legjendës dhe një sezoni me “zero tituj”, për të cituar një personazh që di diçka për Tripletën, qëndron në një dymbëdhjetëshe ndeshjesh.

ARSENAL VS REAL MADRID

“Topçinjtë” shënuan nëntë gola ndaj PSV Eindhoven në fazën e 1/16 për të fluturuar drejt çerekfinaleve për të dytin vit radhazi, ndërsa kampionët në fuqi kishin nevojë për lotarinë e penalltive për të eliminuar rivalët e përbetuar Atletico Madrid. Pak më shumë se dy javë pasi skuadra e femrave e Arsenalit realizoi një përmbysje magjike kundër Real Madridit në çerekfinalet e Champions-it, tani është radha e meshkujve të imitojnë koleget e tyre me fitoren mbresëlënëse 3-0 në “Emirates”, në atë që është pa dyshim ndeshja më e madhe e Mikel Artetas si trajner deri më tani.

I formuar te të rinjtë e Barcelonës, Arteta i dha fund mungesës së gjatë të Arsenalit në çerekfinalet e Champions-it vitin e kaluar dhe e drejtoi sërish skuadrën deri këtu, këtë herë falë një shkatërrimi të pabesueshëm 7-1 ndaj PSV në ndeshjen e parë të 1/16-ave, përpara një barazimi të qetë 2-2 në shtëpi. Arsenal sfidoi mungesat në sulm në fitoren e thellë ndaj holandezëve në ndeshjen e parë, por pas shtatë golave të shënuar për 90 minuta në stadiumin “Philips”, tani ka arritur të shënojë vetëm po aq gola në pesë ndeshjet e fundit, duke e vështirësuar edhe më shumë shpresën tashmë të dobët për titull në Premier League.

SI VIJNË DY SKUADRAT?

Një barazim i vakët 1-1 ndaj Everton të shtunën afroi edhe më shumë Liverpool-in me titullin, megjithatë zgjedhjet e Artetës në formacion ishin të një njeriu që kishte sytë plotësisht te Madrid, ku Arsenal do të përpiqet të zgjasë serinë pa humbje në të gjitha kompeticionet në tetë ndeshje, ndërkohë që do të kërkojë të mbajë të paprekur rekordin e jashtëzakonshëm europian në shtëpi. Në fakt, gjigantët e veriut të Londrës nuk janë mundur në asnjërën nga 10 ndeshjet e fundit të Champions-it në “Emirates” — duke mbajtur portën e paprekur në tetë prej tyre — dhe përgatitjet e Real Madridit për ndeshjen e parë zyrtare ndonjëherë në këtë stadium kanë qenë gjithçka, përveçse ideale.

Lexo më tej: Real Madrid pa portier, kundër Arsenal mund të luajë një 19-vjeçar: debuton Gonzalez

Sa kohë që stoiku Carlo Ancelotti është në pankinën e Real Madrid, “Los Blancos” në dukje do të gjejnë gjithmonë një mënyrë në Champions, dhe kështu ndodhi edhe në ndeshjen e dytë të përballjes së fortë të 1/16-ave me rivalët e qytetit Atletico Madrid. Të tronditur që në minutën e parë nga një gol i Conor Gallagher, fituesit 15 herë të Kupës së Europës u mbështetën te saktësia nga pika e bardhë për të kaluar në çerekfinale për të pestin vit radhazi, dhe tifozëve të Arsenal mund t’u falet nëse shpërfillin rekordin e rivalëve të tyre në këtë fazë.

STATISTIKA SINJIFIKATIVE

Që nga sezoni 2003-04, Real Madrid nuk është eliminuar kurrë në fazën çerekfinale — duke fituar të 12 përballjet me dy ndeshje që atëherë — por skuadra e Ancelottit ka marrë një goditje të vogël në dy ndeshjet e fundit në kampionat. Pas katër golave të pësuar ndaj Real Sociedad në ndeshjen e dytë të gjysmëfinales së Kupës së Mbretit — por duke u kualifikuar gjithsesi në finalen e El Clasico-s me rezultat të përgjithshëm 5-4 — Real Madrid pësoi një humbje të papritur 2-1 ndaj Valencias fundjavën që lamë pas, me Hugo Duro-n që shënoi me kokë një gol të jashtëzakonshëm në minutën e 95-të në “Bernabeu”.

PRECEDENTËT

Sigurisht, Arsenal nuk është i panjohur me mrekullitë e Madridit — goli i jashtëzakonshëm solo i Thierry Henry në fitoren 1-0 në vitin 2006 do të rikujtohet pafund deri në nisjen e ndeshjes — dhe një barazim 0-0 në “Highbury” në ndeshjen e kthimit do të thotë se “Topçinjtë” nuk kanë humbur kurrë ndaj Real Madridit në një ndeshje zyrtare. Megjithatë, në futboll kurrë nuk është vonë për hakmarrje, dhe nëse Real Madrid arrin ta bëjë Arsenalin skuadrën e 112-të të ndryshme që e ka mposhtur në Champions të martën në mbrëmje, një tjetër sezon pa trofe do ta presë Arsenal, përveç nëse ndodh një përmbysje spektakolare në ndeshjen e kthimit.

The post Bayern i sakatuar, Inter ankohet: Arsenal-Real, humbësi kundër fituesit të përjetshëm appeared first on Lapsi.al.