Arbitri Sozza sapo ka sinjalizuar fundin e një pjese të parë katastrofike për Milanin, i cili u dominua nga Napoli në 20 minutat e para pas golave të Politano dhe Lukakut. Futbollistët kuqezi zbresin të dëshpëruar në dhomat e zhveshjes së stadiumit “Maradona”, me shumë pak – nëse jo aspak – për t’u shpëtuar nga ajo performancë. Në pjesën e dytë, ekipi i Conceiçaos do të reagojë, duke e vënë Napolin në vështirësi deri në momentin e fundit të ndeshjes, edhe pse në fund do të mposhtet 2-1. Ndërsa skuadrat kthehen në fushë, kamerat fokusojnë Kyle Walker, i cili ndjek me hap të shpejtë Joao Felix, duke i thënë diçka jo fort miqësore.

Kyle Walker drejt Joao Felix: “Paso topin! Nuk je Messi!”

Mikrofonat kapin fjalët e ashpra të mbrojtësit anglez, një veteran që ka parë gjithçka në karrierën e tij. Ai mund të pranojë të mposhtet nga kundërshtarë më të fortë, por jo një qasje të gabuar ndaj ndeshjes apo një lojtar që luan sipas mendjes së vet. “Paso topin! Nuk jemi Messi!”, i thotë Walker portugezit 25-vjeçar, duke vazhduar ta qortojë me gjeste të dukshme, përpara se të dy të zhduken nga fushëpamja e kamerave.

Joao Felix nuk reagon, duket i shuar, ndërsa gjuha e tij e trupit nuk është ajo e një futbollisti nga i cili mund të pritet një pjesë e dytë me zemërim dhe grintë. Dhe në fakt, Conceição e zëvendëson pas vetëm 10 minutash, duke futur në lojë Leao-n (së bashku me Chukwueze për Bondon). Ky ndryshim i jep Milanit energji të reja në tentativën për të përmbysur rezultatin, që kulmon fillimisht me penalltinë e humbur nga Gimenez dhe më pas me golin e 1-2 të Jovic-it. Kuqezinjtë rrethojnë portën e Napolit në minutat e fundit, duke e vënë në ankth stadiumin “Maradona”, por pa arritur barazimin.

Walker to Felix “PASS THE BALL WE ARE NOT MESSI” #Chelsea #ACMilan #NapoliACMilan #CFC pic.twitter.com/7UNFbZCuen

— The African Lad (@TheAfricanLad25) March 31, 2025

E ardhmja e portugezit duket e vulosur: në fund të sezonit kthehet te Chelsea

Një dështim i plotë për Joao Felix, i cili pas një fillimi premtues me Milanin – pas huazimit nga Chelsea në fund të merkatos së janarit për 3 milionë euro plus 2.5 milionë bonuse – u mbyt në vështirësitë e skuadrës. E ardhmja e 25-vjeçarit duket e paracaktuar: në fund të sezonit, ai do të rikthehet në Londër, në kërkim të një vendi të tij në futbollin europian, pasi dikur kishte iluzionuar të gjithë se ishte një talent i jashtëzakonshëm. Në atë pikë, do t’i takojë Chelsea-t të vendosë për fatin e një lojtari për të cilin pagoi plot 52 milionë euro te Atletico Madrid në verën e vitit 2024.

The post Kyle Walker turpëron Joao Felix në tunelin e “Maradona”: mikrofonat kapin gjithçka appeared first on Lapsi.al.