NATO ka reaguar ashpër ndaj deklaratave të fundit të Rusisë lidhur me situatën rreth enklavës ruse të Kaliningradit, duke dënuar atë që e cilëson si “retorikë të papërgjegjshme bërthamore”.

Zëdhënësja e NATO-s, Alison Hart, konfirmoi se aleanca ka marrë një dokument të dërguar nga Moska, në të cilin Rusia shpreh shqetësimin për atë që i konsideron “veprime provokuese” të NATO-s ndaj Kaliningradit.

“Ne dënojmë fuqimisht kërcënimin e përdorimit të forcës ushtarake, përfshirë çdo retorikë bërthamore të papërgjegjshme”, deklaroi Hart, duke konfirmuar se NATO po përgatit përgjigjen ndaj dokumentit të dërguar nga pala ruse.

Dokumenti u bë publik nga Ambasada e Rusisë në Bruksel përmes platformës X. Në të, Moska shpreh “shqetësimin” e saj për aktivitetet e NATO-s që, sipas saj, përbëjnë provokime ndaj enklavës ruse të Kaliningradit.

Në dokument, Rusia paralajmëron se është e gatshme të reagojë ndaj këtyre zhvillimeve “me të gjithë arsenalin e saj”, formulim që ka shkaktuar reagimin e NATO-s për shkak të referencave ndaj kapaciteteve ushtarake dhe bërthamore.